મહારાણી

  

હર્ષની, ઉલ્લાસની લ્હાણી જ છે, 

જિદગીને ક્યાં તમે માણી જ છે.

સત્ય કહેવાથી ડરો છો કેમ આમ?

છે નસોમાં લોહી કે પાણી જ છે?

ખાસ મરમી હોય એ સમજી શકે,

આ સુગંધો પુષ્પની વાણી જ છે!

કેટલા આવ્યા સિકંદર ને ગયા,

ક્યાં કોઈની ખોટ વર્તાણી જ છે!

જેણે જેણે પણ અહમ્ પોષ્યો દિલે,

એની લંકા ખાસ લૂંટાણી જ છે.

છે બધા પાવન પ્રકારો પદ્યના,

પણ ગઝલ કંઈ ઓર લેખાણી જ છે.

આપ એને લેખિની માનો ભલે,

મારે મન તો એ મહારાણી જ છે.

ચ્હાય છે સૌને મુસાફિર આમ તો,

પણ તમારો ખાસ બંધાણી જ છે.

- મુસાફિર પાલનપુરી